នគរបាលកំពុងសាកសួរមន្ត្រីនគរបាលម្នាក់ ដែលថតកាំភ្លើងបង្ហោះតាមហ្វេសប៊ុក
កំពង់ចាមៈ កម្លាំងនគរបាលការិយាល័យព្រហ្មទណ្ឌនៃស្នងការដ្ឋាននគរបាលខេត្តកំពង់ចាម កំពុងបន្តនីតិវិធីស៊ើបសួរទៅលើមន្ត្រីនគរបាលក្រសួងមហាផ្ទៃម្នាក់ក្រោយពីបានឃាត់ខ្លួនកាលពីយប់ថ្ងៃពុធពាក់ព័ន្ធករណីរក្សាទុក និងប្រើប្រាស់អាវុធខុសច្បាប់បន្ទាប់ពីជននេះបានថតអាវុធបង្ហោះតាមហ្វេសប៊ុករបស់ខ្លួន។
លោក ហេង វុទ្ធី ប្រធានការិយាល័យព្រហ្មទណ្ឌកម្រិតធ្ងន់នៃស្នងការដ្ឋាននគរបាលខេត្តកំពង់ចាមបានប្រាប់ភ្នំពេញ-ប៉ុស្តិ៍កាលពីម្សិលមិញថាលោក លី វណ្ណៈ អាយុ ២៧ ឆ្នាំជាមន្ត្រីនគរបាលនៅក្រសួងមហាផ្ទៃមានទីលំនៅភូមិ ១ សង្កាត់បឹងកេងកង ខណ្ឌចំការមន ត្រូវបានកម្លាំងនគរបាលស្រុកព្រៃឈរ ចាប់ឃាត់ខ្លួននៅវេលាម៉ោង ១០ យប់ថ្ងៃពុធ ទី ១៩ ខែធ្នូ ឆ្នាំ ២០១៨ នៅចំណុចភូមិព្រៃទទឹង ឃុំជ្រៃវៀនក្រោយពីធ្វើការឆែកឆេររកឃើញអាវុធវែង-ខ្លី ចំនួន ២ ដើមដែលគ្មានលិខិតអនុញ្ញាតឲ្យប្រើប្រាស់នៅក្នុងរថយន្ត។
លោកបន្តថានៅពេលសាកសួរកាលពីយប់ថ្ងៃពុធលោក លី វណ្ណៈ បានឆ្លើយដោះសាថា អាវុធទាំងនេះជារបស់បងប្រុសរបស់គាត់ឈ្មោះ ហាក់ ប៉េងឃីម អាយុ ៣៤ ឆ្នាំជាមន្ដ្រីនគរបាលនៅក្រសួងមហាផ្ទៃ។ ប៉ុន្តែនៅព្រឹកថ្ងៃព្រហស្បតិ៍គាត់បានផ្លាស់ប្ដូរចម្លើយដោយប្រាប់ថាអាវុធទាំងនោះជារបស់មិត្តភក្ដិរបស់គាត់ម្នាក់ទៀតដែលជាមន្ត្រីនគរបាលក្នុងក្របខ័ណ្ឌក្រសួងមហាផ្ទៃផងដែរ។
លោក វុទ្ធី បញ្ជាក់ថា៖ «នៅពេលនេះលោក លី វណ្ណៈ កំពុងស្ថិតក្រោមការស៊ើបសួរពីក្រុមមន្ត្រីនគរបាលជំនាញយើង បន្ទាប់ពីចម្លើយរបស់គាត់មានភាពប្រែប្រួល និងក្រោយពីមន្ត្រីយើងបានធ្វើតេស្តទឹកនោមរបស់គាត់ រកឃើញមានផ្ទុកសារធាតុញៀន»។
លោក កែវ សេងហ៊ន អធិការស្រុកព្រៃឈរក៏បានឲ្យដឹងដែរថា ការឃាត់ខ្លួននេះបានធ្វើឡើងក្រោយពីមន្ត្រីរូបនេះបានថតរូបភាពអាវុធវែង-ខ្លី ដាក់នៅលើតាប្លូកាប៊ីនរថយន្តច្រងេងច្រងាង បង្ហោះនៅលើហ្វេសប៊ុកមានឈ្មោះ Kongkia VS ដោយភ្ជាប់ជាមួយនឹងសារប្រាប់ទៅមិត្តភក្តិរបស់គាត់ថា កំពុងធ្វើដំណើរទៅចូលរួមស៊ីការគេនៅខេត្តកំពង់ចាមដែលបង្កឲ្យមានការរិះគន់យ៉ាងខ្លាំងធ្វើឲ្យប៉ះពាល់ដល់សេចក្ដីថ្លៃថ្នូររបស់កងកម្លាំងប្រដាប់អាវុធ។
លោក សេងហ៊ន និយាយថាក្នុងប្រតិបត្តិការចាប់ឃាត់ខ្លួនលោក លី វណ្ណៈ នាយប់ថ្ងៃកើតហេតុនោះក្រុមកម្លាំងនគរបាលចម្រុះនៃស្នងការដ្ឋាននគរបាលខេត្តកំពង់ចាមដែលរួមសហការដោយក្រុមកម្លាំងនគរបាលស្រុកព្រៃឈរ បានរឹបអូសវត្ថុតាងរួមមានរថយន្តម៉ាក Rang Rover ពណ៌ខ្មៅ ១ គ្រឿងពាក់ស្លាកលេខ 2U-0199 អាវុធ Ak-47 មួយដើមលេខ ៤៣៦២ (គ្មានគ្រាប់) និងអាវុធខ្លី ១ ដើមម៉ាក Pak លេខ ០៨១៦.០០១០៤៨ (មានគ្រាប់ ០៦ គ្រាប់)។
លោកបញ្ជាក់ថា៖ «អាវុធទាំងនោះគ្មានលិខិតអនុញ្ញាតឲ្យប្រើប្រាស់នោះទេ។ នៅពេលនេះក្រុមមន្ត្រីនគរបាលជំនាញកំពុងបន្តធ្វើការស៊ើបសួរ និងស្រាវជ្រាវបន្ថែមទៀតលើករណីនេះដើម្បីរកឲ្យឃើញពីប្រភពនៃកាំភ្លើងទាំង ២ ដើមនោះថាគាត់ [លី វណ្ណៈ] បានមកពីណា និងយកមកធ្វើអ្វីឲ្យពិតប្រាកដ»៕
Reacties
Een reactie posten